呃like之选 5大日落靓景！
秋天就最适合亲亲大自然㗎喇！除咗行山郊游之外，记者都好锺意四出睇日落，又靓又浪漫～ 今次就介绍5个睇日落胜地畀大家啦！
下白泥
相信香港人对下白泥都唔陌生，呢度係新界最西面嘅地方之一，所以出咗名可以睇到靓日落！有体力嘅话，仲可以由屯门良田坳行入去，路程大约两小时，沿途风景都好靓～
不过下白泥靓就靓喇，交通就比较唔方便，目前只得一架33号小巴来往元朗同下白泥。日落之后，排队等小巴嘅人龙绝对会吓亲你，而且20分钟先一班车，记者试过足足等咗两个钟先上到车呀呜呜！
交通：★☆☆☆☆
难度：★☆☆☆☆
靓景指数：★★★★☆
机场维修区
呢度係另一个少有可以睇到太阳从海平面消失嘅地方，完全冇高楼大厦遮掩，只要天气符合预期，就可以影到靓靓日落！除咗日落之外，仲可以近距离睇到飞机升降。
记者当日由东涌踩单车去到机场维修区，都只係大约1小时，不过只有大约一半路程有单车径，接近飞机维修区嘅路段都要踩马路或者行人路，记住要注意安全。如果唔想踩单车，亦可以喺东涌搭S52巴士，班次都算密。呢度嘅草地亦可以影到好多靓相～
交通：★★★☆☆
难度：★☆☆☆☆
靓景指数：★★★★★
南朗山海洋公园就去得多喇，附近嘅南朗山你又去过未？以黄竹坑巴士总站起点，15分钟就可以去到南朗山休憩公园，再行45分钟就可以到达山顶停机坪。近至深湾、海洋公园，远至南丫瓜、鸭脷排、香港仔避风塘嘅景色都可以尽收眼底！
交通：★★★☆☆
难度：★★☆☆☆
靓景指数：★★★★☆
蛇岭
近年先开放嘅蛇岭，以往一直都係边境禁区，所以识得嚟嘅人并唔多，由马草垄军营小巴站行到山顶，都只係需要45分钟，呢个毫无阻挡嘅小山丘，绝对係睇日落嘅好地方！
除咗日落之外，呢度嘅夜景亦都好吸引！
交通：★☆☆☆☆
难度：★★☆☆☆
靓景指数：★★★★☆
九龙炮台山呢个炮台山并唔係讲紧港岛线港铁站嗰个炮台山，而係油塘附近嘅炮台山，又称魔鬼山。由油塘港铁站一出，往鲤鱼门邨方向，经卫奕信径第三段就可以到达炮台山，呢度绝对係睇维港景色嘅九龙区代表！
交通：★★★★☆
难度：★★☆☆☆
靓景指数：★★★★★
上一篇：呃Like 中秋Tea 【中环食乜好】
下一篇：呃like必备 5大少女工作坊